Најава за официјална посета на високи претставници на Европската федерација на ветеринари (FVE) во Скопје

Ветеринарната комора на Република Македонија ја информира стручната и пошироката јавност дека на 17 и 18 февруари 2026 година во официјална посета на нашата држава ќе престојуваат високи претставници на Федерацијата на ветеринари на Европа (FVE) – Претседателот д-р Зигфрид Модер и Потпретседателот д-р Пјотр Квиечински.

Посетата се реализира во период кога ветеринарната професија во Република  Македонија се соочува со сериозни предизвици и неповолни услови на функционирање, кои директно влијаат врз одржливоста на теренската ветеринарна мрежа. Во услови на зголемени ризици од појава и ширење на заразни болести кај животните во регионот и земјата, како и растечки биосигурносни закани, од исклучителна важност е одржувањето на ветеринарната служба на високо оперативно и функционално ниво.

Целта на посетата е непосредно запознавање на претставниците на ФВЕ со актуелната состојба во ветеринарниот сектор, размена на информации со надлежните институции и укажување на потребата од континуирана системска и финансиска поддршка за стабилизирање на професијата. Во рамки на посетата се предвидени работни средби со државни институции, меѓу кои Агенцијата за храна и ветеринарство и Владата на Република Македонија, како и состанок со институцијата домаќин- Ветеринарната комора на Република Македонија.

Оваа посета претставува значаен момент за афирмирање на улогата на ветеринарната професија како клучен сегмент во системот на јавно здравје, безбедност на храната и заштита на добиточниот фонд. Ветеринарната служба е суштинска алка во превенцијата и контролата на заразните болести и затоа нејзиното институционално јакнење и одржување на стабилно оперативно ниво е од круцијален општествен интерес.

Ветеринарната комора останува посветена на професионален дијалог и меѓународна соработка со цел обезбедување одржливост, долгорочна стабилност и унапредување на ветеринарниот сектор во интерес на граѓаните,  јавното здравје и производството на храна.