Пролетниот состанок на меѓународната регионална ветеринарна иницијатива Вишеград вет плус (V4Vet+)

Од 15-17 мај 2026 во Лученец, Словачка се одржа пролетниот состанок на меѓународната регионална ветеринарна иницијатива V4Vet+, во која свое учество земаат ветеринарните комори на 16 држави од Средна и Југоисточна Европа, експерти од ветеринарната медицина, претставници на Европската федерација на ветеринари, Унијата на ветеринарни практичари на Европа и Светската ветеринарска асоцијација

На состанокот пред се беше истакната моменталната  епизоотиолошката состојба во земјите членки, а особен аспект беше посветен на појавата и ширењето на Сипаниците кај малите преживари, Чумата кај мали преживари, Лигавка и шап, Син јазик, Африканска свинска чума, Авијарната инфлуенца, Њукасл болеста во живинарството, и др. Особено беше потенцирана повторното појавување на PPR кај овци и кози во Албанија, појавата на  Лигавка и шап на островот Лезбос во Грција и огромните штети од Сипаниците кај малите овците и козите, актуелна болест која ја има и во нашата држава.

Меѓу другото беа истакнати :

• проблемот со достапноста на ветеринарните лекови во земјите на Европската унија и регулација за нивна употреба,
• недостаток на ДВМ во руралните средини и покренување на иницијатива за испраќање на документ со заеднички став до Европскиот парламент за потребата од поддршка и имплементирање на мерки за креирање на Стратегија за рурален доктор и намалување на нивниот недостаток. Позитивен пример е Баварската покраина во Германија, која веќе креирала своја стратегија за поддршка на одредена квота на ДВМ кои ќе ги пополнат руралните области каде нема веќе активни ДВМ, поддржана со финасиска помош,
• менување на стратегијата во справување со заразните болести: Вакцинација наместо колење во кризните подрачја за болестите за кои постои вакцина,
• улогата на практичарите како државни инспектори, искуства од одредени земји на постоењето на категоријата овластен ветеринар,
• климатските промени и нивното влијание врз појавата на нови болести, со посебен осврт на болестите на пчелите и одржувањето на пчеларскиот сектор,
• Континуираната едукација во земјите членки на ФВЕ, нејзината важност, имплементација, развој и можност за нејзино унифицирање.

Македонската делегација уште еднаш ја истакна тешката материјално-финасиска состојба на ветеринарните друштва и исклучително нискиот буџет за здравствена заштита и беше истакната благодарност до Претседателот и Потпретседателот на ФВЕ, Д-р Зигфрид Модер и Д-р Пјотр Квиечински за нивната сестрана поддршка на Ветеринарната комора и на ветеринарната професија на Р.Македонија. Исто така беше истакната и моменталната епизоотиолошка состојба во Р.Македонија и предизвиците со кои се соочуваат ДВМ.

Вишеградската V4Vet+ група на ветеринарни комори претставува исклучително важна платформа за соработка и размена на информации и искуства за Ветеринарната комора и за заеднички настап и лобирање пред европските институции. Таа ни дава директна  можност за учество во креирањето на ветеринарните политики во Европа.