Одржан семинар „Современи предизвици во ветеринарната професија – знаење, искуства и практика“

На 06 декември 2025 година, во хотел „Меркур“ во Тетово, Ветеринарната комора на Република Македонија успешно го реализира еднодневниот семинар на тема „Современи предизвици во ветеринарната професија – знаење, искуства и практика“. Настанот се одржа во професионална и конструктивна атмосфера, со присуство на повеќе од 200 учесници, гости и претставници на институциите од државата и од регионот.

Семинарот беше свечено отворен со обраќања од претседателот на Ветеринарната комора, д-р Жарко Михајлоски, и проф. д-р Јусуф Зејнели, ректор на Универзитетот во Тетово, кои ја истакнаа важноста на континуираната стручна едукација, регионалната соработка и градењето силна и стабилна ветеринарна професија.

Особена чест претставуваше присуството на претставници од ветеринарните комори на Словенија, Албанија и Косово, како и претставници од релевантни домашни институции и академската заедница, кои дадоа поддршка на заедничките заложби за развој на професијата.

Во рамките на програмата, угледни предавачи од Македонија, Словенија, Србија и Албанија ги презентираа најновите сознанија и современи пристапи во патохистолошката дијагностика, кардиологијата, хирургијата, онкологијата кај домашните миленици, како и актуелните состојби и предизвици со кои се соочува ветеринарната професија.

Семинарот заврши успешно, а учесниците стекнаа нови знаења, практични информации и контакти кои ќе придонесат за унапредување на секојдневната работа и подигнување на стандардите во ветеринарната пракса. Ветеринарната комора и понатаму останува посветена на својата мисија за континуирано јакнење на професијата преку едукација, професионална поддршка и развој на нови можности за стручна соработка.