Делегација на Ветеринарната комора на Р. Македонија на редовните годишни собранија на FVE и UEVP

Од 13 до 15 ноември 2025 година во Лимасол, Кипар се одржаа јубилејното 55. Годишно собрание на Унијата на ветеринарни практичари на Европа (UEVP) и редовното Годишно собрание на Европската федерација на ветеринари (FVE), која оваа година го одбележа својот значаен 50-годишен јубилеј. На настаните присуствуваа делегации од речиси сите европски земји, како и претставници на Американската ветеринарно-медицинска асоцијација (AVMA) и Светската ветеринарна асоцијација (WVA).

Делегацијата на Ветеринарната комора на Р.Македонија, составена од д-р Жарко Михајлоски, претседател на ВКМ, д-р Рами Селмани, потпретседател на ВКМ и д-р Томислав Николовски, извршен директор на Комората, оствари бројни средби и консултации со колеги и претставници на професионални организации од Европа и регионот.

На собранието на UEVP беше разгледан извештајот за работата во претходниот период, финансискиот план, членарината и приоритетите за унапредување на ветеринарната професија. Посебен акцент беше ставен на:

• Имплементација на концептот „Animal Health Visits“, кој во ЕУ се спроведува како важен механизам за превентивна ветеринарна грижа. Препорака е оваа практика да биде воспоставена и во нашата земја како дел од усогласувањето со европските стандарди.
• Антимикробната резистентност (АМР), концептот Едно здравје и значењето на биосигурноста, особено во контекст на ризикот од појава на опасни заразни заболувања.
• Историски осврт по повод јубилејот на UEVP и идните насоки за развој на европската ветеринарна пракса.

На собранието на FVE беше усвоена новата Стратегија 2026–2030, насочена кон создавање одржлива, модерна и силна ветеринарна професија, заснована врз принципите „Едно здравје – Една благосостојба“ (One Health – One Welfare), посилно застапување и паметно законодавство, поддршка на ветеринарната работна сила преку подобро образование, благосостојба и кариерни патеки и обединет ветеринарен глас.

FVE ги презентираше и следните клучни иницијативи:

• Официјална позиција за вакцинацијата на животните, со која вакцинацијата се прогласува за социо-економски столб на здравјето на животните и предуслов за европска одржливост.
• Меѓународни активности за целосно затворање на фармите за крзно, во соработка со FECAVA и WSAVA, со акцент на подигнување на стандардите за благосостојба на животните.
• Зајакнати европски правила за одгледување, идентификација и регистрација на кучиња и мачки, со фокус на спречување злоупотреби и воведување унифицирани стандарди за сите одгледувачи.
• Административни оптоварувања за ветеринарите, со нагласување на потребата за намалување на бирократските процедури и користење на дигитални алатки за олеснување на секојдневното професионално работење.