ОДРЖАНА ЕСЕНСКАТА КОНФЕРЕНЦИЈА НА ВИШЕГРАДСКАТА ВЕТ+ ГРУПА НА ВЕТЕРИНАРНИ КОМОРИ ОД ЗЕМЈИТЕ ОД СРЕДНА И ЈУГОИСТОЧНА ЕВРОПА

Од 10.10.2025 до 12.10.2025 година во Вишеград, Унгарија беше одржана есенската конференција на Вишеградската Вет+ група на ветеринарни комори од земјите од средна и југоисточна Европа во рамките на проектот „Прекуграничен самит за ветеринарна соработка“, на кој учествуваа делегации од 14 земји. Самитот го отвори и се обрати претседателот на Унгарската ветеринарна комора д-р Габор Генци. На самитот свое присуство и обраќање имаа и претседателот на Европската федерација на ветеринарни комори д-р Зигфрид Модер (Германија) и претседателот на Европската унија на ветеринарни практичари д-р Фолкер Мозер (Австрија)

На состанокот беше изложена епизоотиолошката состојба во земјите членки и актуелните состојби во ветеринарната професија. Ветеринарните служби во Европа, можеби како никогаш досега, се наоѓаат во постојана опасност од избивање на опасно заразни болести кај домашните животни и затоа беше потенцирана потребата од исклучелна спремност на ветеринарните служби во справувањето со заразните болести и нивна соодветна државна поддршка.

Свое учество и извештај на состанокот имаше и делегација на Ветеринарната комора на Македонија во состав д-р Жарко Михајлоски Претседател на ВКМ и д-р Томислав Николовски, извршен директор на Комората, кои што ја изложија моменталната епизоотиолошка состојба и предизвиците со кои се соочува ветеринарната професија во нашата држава.

Во дискусијата беше дадена поддршка за постигнување на нашите цели за соодветна валоризација на ветеринарната професија, која за жал во споредба со европските искуства се најдува на маргините на нашето општество.