ОДРЖАН СОСТАНОК НА ОДБОРОТ НА ВРАБОТЕНИ ВО НАУЧНО-ОБРАЗОВНИ ИНСТИТУЦИИ ПРИ МВК

На 30 јуни 2025 година, на Факултетот за ветеринарна медицина-Скопје, се одржа состанок на Одборот на вработени во научно-образовните институции при Ветеринарната Комора на Македонија. На состанокот присуствуваа претставници од трите универзитети во Република Македонија.

Присутните разговараа за повеќе клучни аспекти поврзани со работата на Одборот, вклучувајќи ги неговите активности, надлежности и улогата што ја има во унапредувањето на образованието и науката во ветеринарниот сектор. Посебен акцент беше ставен на процесот на континуирана едукација на ветеринарните професионалци, нејзиниот квалитет и начинот на валоризација во рамките на системот на стручно усовршување на докторите по ветеринарна медицина.

Членовите на Одборот се согласија дека е потребна поголема фреквенција на состаноци со цел унапредување на работата на Одборот и на Ветеринарната Комора како целина.

Во заклучок, беше договорено интензивирање на комуникацијата и соработката помеѓу универзитетите и Комората, како и подготовка на конкретни предлози за подобрување на системот на континуирана едукација.