Потпишан договор за соработка со Хрватската ветеринарна комора

Од  25 до 28 октомври 2017 година во Опатија , Република Хрватска под покровителство на највисоките државни структури  се одржаа Ветеринарните денови 2017.
Ветеринарните денови претставуваат најголем собир на докторите по ветеринарна медицина кој ги обединува ветеринарите од мала и голема пракса, ветеринарите од јавно здравство , експерти од областа на науката и биомедицината и сите оние кои директно или  индиректно соработуваат со ветеринарната професија за подобрување на ветеринарната професија и ветеринарната наука во Република Хрватска.
На покана на Претседателот на Хрватската ветеринарна комора д-р Иван Форгач, на конгресот присуствуваше Претседателот на Ветеринарната комора на Р.М  д-р Томислав Николовски.
Во рамките на настанот на пригодна свеченост беше потпишан Договор за меѓусебна соработка помеѓу двете комори. При одржувањето на пригодните говори двајцата претседатели освен задоволството од официјализирањето на односите , посебно се истакна дека дополнителен мотив за успешна и содржајна соработка се бројните доктори по ветеринарна медицина кои работат во РМ, а своето образование го завршиле на Универзитетот во Загреб.
Согласно потпишаниот Договор, двете комори ќе соработуваат по прашања кои се однесуваат на професионалните здруженија и професионалниот развој на членовите, како и застапување на заедничките интереси. Освен билатерална соработка во наведените области, Коморите ќе соработуваат и во рамките на земји членки на Вишеградската група плус и со трети страни, како и со Федерацијата на ветеринари на Европа (ФВЕ) и нејзините секции, притоа водејќи грижа за интересите на своите членови.
Како дел од соработката меѓу Коморите постојано ќе се бараат можности за размена или заедничко спроведување на успешни програми за професионален развој и обука на своите членови со предавачи кои ќе го извршуваат стручно усовршување и оспособување.