Договор за соработка со Ветеринарната комора на Република Србија и Сојузот на Ветеринарни лекари на Бугарија

На 21.09.2017 година во Охрид,  Ветеринарна комора на Р.Македонија , беше домаќин и организатор на настан по повод потпишување на Договор за соработка со Ветеринарната комора на Република Србија  и Сојузот на Ветеринарни лекари на Бугарија.

На покана на Претседателот на Ветеринарната комора на Република Македонија д-р Томислав Николовски на настанот присутствуваше делегација од Ветеринарната комора на Република Србија во состав: Претседател на комората, д-р Давор Шашик, Претседател на извршен одбор д-р Миодраг Милковиќ и Претседател на Златиборски регион на Комората д-р Дубравко Гудурик, од Сојузот на Ветеринарни лекари на Бугарија присутствуваше Претседателот д-р Михаел Баштавелов и Секретарот д-р Ирина Тодорова.
На настанот присуствуваа и претставници на Ветеринарните комори од Унгарија, Албанија и Република Српска, амбасадорот на Република Србија во Македонија Душанка Дивјак-Томиќ, како и претставници на науката и државни институции од Македонија: Заменик-министерот за земјоделство, шумарство и водостопанство Власте Димковиќ, директорот на Агенцијата за храна и ветеринарство д-р Зоран Атанасов, директорот на  Агенцијата за финансиска поддршка во земјоделството и руралниот развој д-р Николче Бабовски и деканот на Ветеринарниот факултет во Битола проф.д-р Живко Гацовски. 

Коморите заемно ќе работат на развој на дигнитетот на ветеринарната професија и размена на искуства во областите на соработка со локалните, националните и меѓународните организации, ќе воспостават соработка за спроведување на заеднички програми во делот на континуирано образование.