Повторно активирање на Барањето за измени и дополнувања на Законот за ДДВ во насока на намалување на стапката на ДДВ за ветеринарни услуги и ветеринарно медицински препарати

Почитувани колеги,

Ве известуваме дека Ветеринарната комора на Р.Македонија иницира постапка за измени на Законот за ДДВ во насока на намалување на  стапката на ДДВ од 18% на 5 % за ветеринарни услуги и ветеринарно медицински препарати.
За таа цел на 15.09.2017 год. доставено е Барање до Премиерот на Р.Македонија Г-дин Зоран Заев  и до Министерот за Финансии на Р.Македонија Д-р Драган Тевдовски,  со следните предлог мерки:

• Инкорпорирање на ветеринарни услуги во повластената стапка на ДДВ. Позитивните ефекти од спроведување на оваа мерка ќе значат зголемена ликвидност на ветеринарните друшта, можност за инвестиции во нови технологии и опрема, подобрена едукација на кадарот и севкупно зголемување на квалитетот на ветеринарните услуги за земјоделско-ветеринарниот сектор.
• Инкорпорирање на ветеринарни лекови и вакцини во повластената стапка на ДДВ. Позитивните ефекти од спроведување на оваа мерка ќе предизвикаат зголемена ликвидност на ветеринарните друштва, можност за инвестиции во опрема и нови технологии, подобрување на едукацијата на кадарот и подобрување на квалитетот на ветеринарните услуги за земјоделскиот сектор и намалување на цената на чинење на ветеринарните лекови за крајните корисници.
• Спроведување на мерки за подобрување на едукацијата и опременоста на ветеринарните друшта со софистицирана опрема. Ефектот од спроведувањето на државните мерки за развој на земјоделството би бил уште поголем доколку се подржи и ветеринарниот сектор преку: подршка во набавка на софистицирана опрема во склоп на националните програми за финансиска подршка како и преку систем на подршка во континуирана едукација на ветеринарните лекари за нови технологии и техники преку Ветеринарната комора.

Предложените измени и дополнувања во Законот за ДДВ се поднесуваат поради неопходноста од вклучување на стимулативни мерки кои квалитативно ќе го подобрат и унапредат овој сектор, имајќи го предвид значењето на ветеринарната дејност во однос на грижата за животните, а преку нив и грижата за општото здравје на населението. За иницијативата е информиран директорот на Агенција за храна и ветеринарство д-р Зоран Атанасов и се очекува целосна подршка за реализација на овој план.

допис 1, допис 2

Со почит,

Ветеринарна комора на Р.Македонија
Претседател:
Д-р Томислав николовски